قانونِ حضانت
شرعی عائلی احکام کی دفعہ بندی:
قانونِ حضانت (چوتھی قسط)
قانونِ حضانت
(اولاد کی پرورش و تربیت اور نگہداشت و پرداخت کو شریعت کے خطوط پر اُستوار کرنے کا قانون)
تمہید
ہرگاہ کہ قرینِ مصلحت ہے کہ اولاد کی پرورش و نگہداشت اور تربیت و پرداخت کے متعلق ایک جامع اور مکمل، مفصل اور مدلل، اسلامی خطوط پر اُستوار اور تعلیماتِ شرعیہ کے موافق ومطابق قانون بنایا جائے، تاکہ خداوند تعالیٰ کی خوشنودی کے ساتھ مملکتِ خداداد پاکستان کے قیام کی حقیقی غرض و غایت ، اساسی مقصد اور بنیادی ہدف کو حاصل کیا جاسکے اور ایک صالح اور پاکیزہ معاشرے کے قیام کو عمل میں لایا جاسکے، لہٰذا درج ذیل قانون وضع کیا جاتا ہے ۔
دفعہ۱۔مختصر عنوان، وسعت اور نفاذ:
(الف) یہ قانون ’’قانونِ پرورشِ اولاد‘‘ کہلائے گا ۔
(ب) اس کا اطلاق دستورِ اسلامی جمہوریہ پاکستان کی دفعہ کے احکام کے تابع پورے پاکستان پر ہوگا۔
(ج) اس قانون کا نفاذ اس تاریخ سے ہوگا جو آئین کے تحت مجاز فرد یا ادارہ یا جیسی صورت ہو، اس کے لیے تجویز کرے ۔
دفعہ۲۔تعریفات:
اس قانون میں تاوقتیکہ سیاق و سباق عبارت سے کچھ اور مطلب ومفہوم نہ نکلتاہو، درج ذیل الفاظ کے وہی معنی لیے جائیں گے جو بذریعہ ہٰذا ان کے لیے بالترتیب مقرر کیے گئے ہیں، یعنی:
ذو رحم محرم : ا س سے مراد بچہ کا ایسا رشتہ دار ہے جو تین صفات کا حامل ہو :
- بچہ کے ساتھ اس کا رشتہ نسب کا رشتہ ہو ۔
- بچہ کے ساتھ اس کا نکاح ہمیشہ کے لیے حرام ہو ۔
- نکاح نسب کے سبب نہ کہ کسی اور سبب مثلاً رضاعت یا مصاہرت کے سبب حرام ہو ۔
سفر: اس سے مرادسفرِ لغوی یا سفرِ شرعی نہیں، بلکہ زیرِ پرورش بچہ کے جائے قیام سے اتنی مسافت مراد ہے کہ بچہ کا سرپرست ونگران دن ہی دن کو بچہ سے مل کر واپس نہ لوٹ سکے۔
سال : سال سے مراد قمری سال ہے ۔
حاضنہ : شرعی اہلیت رکھنے والی وہ عورت جسے بچہ کی پرورش سپرد ہو ۔
بچہ : اس سے مراد نابالغ لڑکا یا لڑکی یا ان کے مشتقات ہیں ۔
ولی : ولی سے مراد زیرِ پرورش کا ولی ہے جسے اس پر شرعی ولایت حاصل ہو۔
وصی : وصی کا مطلب و ہ شخص ہے جسے نابالغ کے باپ یا داد انے نابالغ کی نگہداشت و پرداخت یا اپنے ترکہ کی تولیت و انتظام سپرد کیا ہو۔
پنچایت : دو یا دو سے زائد بالغ ،اہل علم ،مسلمان مردوں پر مشتمل ایسی جماعت ہے جو دین دار ، تجربہ کار اور صاحبِ بصیرت ہوں اور ترجیحاً زیرِ پرورش کے قرابت دار ہوں۔
ذوی الارحام: اس سے شرعی قانونِ وراثت کی اصطلاح مراد ہے، مگر زیرِ پرورش کا محرم ہونا بھی لازمی شرط ہے۔
دفعہ: دفعہ سے قانونِ ہذا کی دفعہ مراد ہے۔
شق: اس دفعہ کی شق مراد ہے جس میں وہ واقع ہو۔
مذکر ومؤنث: وہ الفاظ جن سے صیغۂ مذکر کا مفہوم نکلتاہو،صیغۂ مونث پر بھی حاوی سمجھے جائیں گے۔
واحد اور جمع: صیغہ واحد کے الفاظ میں جمع اور صیغہ جمع کے الفاظ میں واحد کا صیغہ بھی شامل ہے۔
دفعہ۳۔حضانت کی تعریف:
شرعی مستحق کا بچے کی پرورش کرنے کو حضانت کہتے ہیں ۔
مستحقینِ حضانت
دفعہ۴۔ماں کا حقِ حضانت:
حضانت کا اولین حق بلاقیدِ مذہب سگی ماں کو ہے، چاہے وہ :
۱۔ زیرِ پرورش کے باپ کی منکوحہ ہو ، یا
۲۔ طلاقِ رجعی یا بائن کی عدت میں ہو ، یا
۳۔ شوہر کی موت یا دیگر اسبابِ فسخ کی بناپر اس کی زوجیت سے خارج ہوگئی ہو، شرط یہ ہے کہ قانون ہذا کے احکام کے تابع پرورش کی اہلیت رکھتی ہو ۔
دفعہ۵۔غیر مسلمہ کاحقِ حضانت:
غیرمسلمہ پرورش کنندہ کو،خواہ ماں ہو یا کوئی اور ، اگر مرتدہ نہ ہو ،اگر چہ کسی آسمانی دین کی پیرو نہ ہو، اس وقت تک مسلمان بچے کی پرورش کاحق ہے، جب تک:
الف۔ بچے میں دین سمجھنے کی صلاحیت پیدا نہ ہو، یا
ب۔اس کے متعلق کفر سے مانوس ہونے کا اندیشہ نہ ہو۔
مگر شرط یہ ہے کہ کسی غیر مسلمہ کوسات سال سے زائد کسی لڑ کی کاحقِ پرورش نہ ہوگا ۔
توضیح:غیر مسلمہ کوغیر مسلم کم سن کے متعلق دفعہ ہذامیں مذکورقیود کے بغیر بھی حقِ پرورش حاصل ہے۔
دفعہ ۶۔ماں کی قرابت دار عورتوں کا حقِ حضانت:
ماں کی بوجہ وفات عدم موجود گی، یا
پرورش پر غیر آمادگی، یا
عدمِ اہلیت کی بنا پر
حضانت کا حق بالترتیب مندرجہ ذیل عورتوں کو حاصل ہوگا اور زیرِحضانت کا ولی اپنے حین حیات یا بعد از وفات بذریعہ تقررِ وصی مستحقِ حضانت عورت کا حقِ حضانت زائل نہیں کرسکے گا:
۱۔نانی ۲۔پرنانی
۳۔سکڑ نانی(خواہ کتنے ہی اوپر کڑی کی کیوں نہ ہو ) ۴۔دادی
۵۔پردادی ۶۔سکڑدادی(خواہ کتنے ہی اوپر درجہ کی ہو )
۷۔سگی بہن ۸۔ماں شریک بہن
۹۔باپ شریک بہن ۱۰۔سگی بہن کی بیٹی(سگی بھانجی )
۱۱۔ماں شریک بہن کی بیٹی(مادری بھانجی) ۱۲۔سگی خالہ
۱۳۔ماں شریک خالہ(مادری خالہ ) ۱۴۔باپ شریک خالہ (پدری خالہ )
۱۵۔باپ شریک بہن کی بیٹی ۱۶۔سگی بھتیجی
۱۷۔ماں شریک بھتیجی ۱۸۔باپ شریک بھتیجی
۱۹۔سگی پھوپھی ۲۰۔ماں شریک پھوپھی
۲۱۔باپ شریک پھوپھی ۲۲۔ماں کی سگی خالہ
۲۳۔ماں کی ماں شریک خالہ ۲۴۔ ماں کی باپ شریک خالہ
۲۵۔باپ کی سگی خالہ ۲۶۔باپ کی ماں شریک خالہ
۲۷۔باپ کی باپ شریک خالہ ۲۸۔ ماں کی سگی پھوپھی
۲۹۔ماں کی ماں شریک پھوپھی ۳۰۔ماں کی باپ شریک پھوپھی
۳۱۔باپ کی سگی پھوپھی ۳۲۔باپ کی ماں شریک پھوپھی
۳۳۔باپ کی باپ شریک پھوپھی
توضیح: درج بالافہرست رشتہ دارانِ اناث متذکرۃ الذیل اصولوں پر مبنی ہے:
(الف) حقِ حضانت میں عورتوں کو مردوں پر اورماں کے قرابت داروں کو باپ کے رشتہ داروں پر ترجیح حاصل ہے۔
(ب) حقِ حضانت درجہ بدرجہ قریب سے بعید عورت کی طرف منتقل ہوگا ، جب قریبی رشتہ دار عورت نہ ہو یا ہو مگر آمادہ نہ ہو یا دست بردار ہو چکی ہو یا نااہل ہو تو دور کی رشتہ دار عورت کو حق حاصل ہوگا۔
(ج) ایک درجہ میں دو مستحق رشتہ دار جمع ہوجائیں تو ترجیح اسے حاصل ہوگی جو جانبین سے قرابت رکھتا ہو ۔
(د) چچا زاد ، تایا زاد ، پھوپھی زاد ، خالہ زاد اور ماموں زاد بہنوں کو حقِ حضانت حاصل نہ ہوگا۔
دفعہ۷ ۔ عصبات کا حقِ حضانت:
(الف) ماں یادفعہ۵ اور ۶میں مذکورپرورش کی مستحق کوئی عورت نہ ہو ،یا
ہو مگر اہلیت نہ رکھتی ہو، یا
اہلیت رکھتی ہو مگرپرورش پر آمادہ نہ ہو،یا
پرورش پر آمادہ ہو مگر مدتِ پرورش اختتام پذیر ہوچکی ہو تو حقِ پرورش قانونِ وراثت کے مطابق درجہ بدرجہ عصبہ کو ہوگا، یعنی :
۱۔ باپ ۲۔ دادا
۳۔ پڑدادا ۴۔ سگا بھائی
۵۔ باپ شریک بھائی ۶۔ سگے بھائی کا لڑکا (سگابھتیجا )
۷۔ باپ شریک بھائی کا لڑکا (سوتیلا بھتیجا ) ۸۔ سگا چچا
۹۔ باپ شریک چچا (سوتیلا چچا ) ۱۰۔ سگے چچاکا لڑکا
۱۱۔ باپ شریک چچا کا لڑکا ۱۲۔ باپ کا حقیقی چچا
۱۳۔ باپ کا پدری چچا ۱۴۔ دادا کا حقیقی چچا
۱۵۔ دادا کا پدری چچا
اگر بچہ کسی حاضنہ کے زیرِ پرورش ہو تومدتِ پرورش کے اختتام پرعصبہ کو بچہ اپنی تحویل میں لینے کا حق ہوگا اوراگرعصبہ مطالبہ نہ کرے یاآمادہ نہ ہوتو بزورِ عدالت اسے مجبور کیا جائے گا۔
(ب) عصبہ میں شرط ہوگا کہ:
۱۔ اس کا دین اور زیرِ پرورش کا دین ایک ہو ،بنا بر ایں ایک عیسائی بچی جس کا ایک بھائی مسلمان اور دوسرا عیسائی ہو ،وہ عیسائی بھائی کی تحویل میں دی جائے گی ۔
۲۔ عصبہ کا زیرِ پرورش لڑکی کا محرم ہونا شرط ہے، بنابرایں لڑکی بر بنائے استحقاق کسی غیر محرم عصبہ کی پرورش میں نہیں دی جائے گی ،خواہ:
- لڑکی کاذوی الارحام میں سے کوئی محرم ہو یا نہ ہو
- لڑکی بہت کمسن ہو یامشتہاۃ ہو
- عصبہ قابلِ اطمینان ہو یا ناقابلِ اعتماد ہو
(د) اگر ایک ہی درجے میں پرورش کے مستحق کئی اشخاص جمع ہوں اور سب ہی پرورش کے خواہاں ہوں تو جو زیادہ بہتر و مناسب ہو وہ مقدم ہوگا، پھر جو زیادہ پرہیزگار ہو، پھر جو زیادہ عمر رسیدہ ہو ۔ (جاری ہے)
شرعی عائلی احکام کی دفعہ بندی:
قانونِ حضانت (پانچویں قسط)
دفعہ۸۔ذوی الارحام کا حقِ حضانت:
- دفعہ۴،۵،۶اور۷ میں مذکورمستحقینِ حضانت کی عدم موجودگی یا غیر آمادگی یا عدمِ اہلیت کی صورت میں پرورش کا حق درج ذیل ترتیب کے مطابق ذوی الارحام کوہوگا:
الف۔ ماں کا باپ ب۔ اخیافی بھائی
ج۔ اخیافی بھائی کا بیٹا د۔ ماں کا چچا
ھ۔ حقیقی ماموں و۔ پدری ماموں
ز۔ مادری ماموں
- ذوی الارحام ’’الأقرب فالأقرب‘‘ کے اصول کے تحت حضانت کے حق دار ہوں گے۔
- اگر ایک ہی درجہ میں ایک سے زائدمستحق حضانت اشخاص جمع ہوجائیں اورسب ہی اہل اورپرورش کے خواہاں ہو توجو زیادہ بہتر و مناسب ہو وہ مقدم ہوگا پھر جو زیادہ پرہیزگار ہو پھر جو زیادہ عمر رسیدہ ہو ۔
- چچازاد،پھوپھی زاد،ماموں زاد اور خالہ زاد بہنوں کو حق حضانت حاصل نہ ہوگا، خواہ زیرحضانت اورحاضنہ کی جنس ایک ہویامختلف ۔
- ذوی الارحام سے مراد یہ ہے کہ جو:
الف۔ عصبہ نہ ہوں ب۔ ذی رحم ہوں
ج۔ محرم ہوں
دفعہ۹۔پرورش کنندہ کی اہلیت:
- )پرورش کنندہ ماں ہو یا اس کی کوئی عزیزہ یاکوئی مرد ہو، لازم ہے کہ درج ذیل صفات کا حامل ہو:
الف : آزاد ہو ب: عاقل ہو
ج: بالغ ہو د: قابل اعتماد ہو
ھ: پرورش پر قدرت رکھتا ہو
و: ایسے فسق میں مبتلا نہ ہو جس کے سبب بچے کے ضیاع کا اندیشہ ہو
ز: بچہ کا ذی رحم محرم ہو۔
- پرورش کنندہ عورت ہو تو مزید شرط ہو گا کہ :
الف : بچے کے غیر ذی رحم محرم سے نکاح نہ کرلے یاایسے شخص کے نکاح میں نہ ہو۔
ب: خود بچے کی ذو رحم محرم ہو ۔
ج: بچے کو زیر پرورش لینے پر آمادہ ہو ۔
د: بچے کو نفرت والے ماحول میں نہ رکھے ۔
ھ: مرتدہ نہ ہو۔
و: قانون ہذا کے احکام کے تحت بچے کی مفت پرورش سے انکار نہ کرتی ہو جب کہ کوئی اور حضانت کا اہل رضاکارانہ پرورش پر آمادہ ہو۔
ز: قانون ہذا کے احکام کے تحت بچے کوولی کی مرضی کے خلاف دورمنتقل نہ کیا ہو۔
- پرورش کنندہ عصبہ ہو توشرط ہوگا کہ:
اس کا اور بچے کا دین ایک ہو ۔
توضیح ۱۔اگر پرورش کنندہ مکاتبہ ہو تو اسے معاہدہ کتابت کے بعدپیدا ہونے والے بچہ کا حق پرورش حاصل ہوگا ۔
توضیح۲۔ اگر پرورش کنندہ مراہق ہو تو اسے حق حضانت حاصل ہوگا بشرطیکہ وہ مراہقت کا دعوی بھی کرتا ہو۔
توضیح ۳۔عصبہ میں سے چچازاد کو باوجود عدم محرمیت کے لڑکے کی پرورش کا حق ہوگاتاہم غیر محرم عصبہ کو بچی کی پرورش کا حق نہ ہوگاالایہ کہ دیگر اہل اشخاص کی عدم موجودگی یا عدم رضامندی یا عدم اہلیت کی بنا پر عدالت اسے موزوں تصور کرے۔
توضیح۴۔ اگر مستحق حضانت درج بالاشرائط میں سے کوئی ایک شرط بھی کھو دے تو اس کاحق حضانت ساقط ہوجاتا ہے۔ (جاری ہے)
شرعی عائلی احکام کی دفعہ بندی:
قانونِ حضانت (چھٹی قسط)
دفعہ۱۰۔ اجنبی سے نکاح کے سبب حضانت کا سقوط:
حاضنہ کا حقِ پرورش بچے کے غیرذی رحم محرم سے محض نکاح کے سبب ساقط ہوجائے گا،مگر یہ کہ:
الف۔ حاضنہ زیرِ پرورش کی نانی ہو اور بچہ کے داداسے نکاح کرلے۔
ب۔ حاضنہ زیرِ پرورش کے چچا سے نکاح کرلے۔
ج۔ حاضنہ بچے کے کسی اور نسبی رشتہ دار سے جس سے خون کے رشتہ سے بچے کا نکاح حرام ہو،نکاح کرلے۔
توضیح:غیر ذی رحم محرم وہ ہے جس سے:
الف۔ نسبی رشتہ ہو
ب۔ وہ محرم بھی ہو
ج۔ اس سے نکاح کی حرمت نسب کی وجہ سے ہو۔
لہٰذادرج ذیل اشخاص سے نکاح بھی حضانت کے سقوط کا باعث ہوگا:
رضاعی چچا: کیونکہ نکاح حرام ہے مگر نسب کارشتہ نہیں
چچازاد: کیونکہ نسبی رشتہ ہے مگرنکاح حرام نہیں
رضاعی چچا کانسبی بیٹا: کیونکہ رشتہ داربھی ہے اور نکاح بھی حرام ہے، مگر نکاح نسب کے سبب نہیں، بلکہ رضاعت کے سبب حرام ہے۔
دفعہ۱۱۔ حضانت کی بحالی:
نااہل اہلیت کی شرط پوری کرکے حقِ حضانت حاصل یابحال کرسکتا ہے، مزید یہ کہ حضانت سے دست برداری کے بعد اس سے رجوع بھی ممکن ہے۔
توضیح:مطلقہ بائنہ طلاق کے بعد اورمطلقہ رجعیہ عدت کی تکمیل کے بعد حضانت کی مستحق ہوگی۔
دفعہ۱۲۔حضانت پرجبر
ماں یا کسی اورپرورش کنندہ عورت یا مرد کو پرورش کرنے پر مجبور نہیں کیا جاسکتا، مگر یہ کہ اس کے علاوہ کوئی اور نہ ہو یا ہو مگر اہلیت نہ رکھتا ہویا اہلیت رکھتا ہومگر آمادہ نہ ہو۔
توضیح: حضانت پر جبر استحقاقِ اُجرت کے منافی نہیں۔
تمثیل۱۔ پانچ سالہ زید کے والدین میں علیحدگی ہوجاتی ہے۔زید کی نانی حیات ہے، مگر بڑھاپے کی وجہ سے حضانت پر قدرت نہیں رکھتی اوردادی بھی موجود ہے مگر زید کو زیر حضانت لینے پر آماد ہ نہیں ہے اورکوئی دوسری حاضنہ موجود نہیں ہے تو زید کی والدہ زید کی حضانت پر مجبور کی جائے گی۔
تمثیل ۲۔ زید کی والدہ اپنے شوہر سے فرقت کے بعد زید کے غیر محرم سے نکاح کرلیتی ہے۔ زید کی بہن اور خالہ بھی ہیں اوردونوں حضانت کی اہلیت رکھتی ہیں، مگر خالہ حضانت پر آمادہ نہیں ہے تو زید کی بہن حضانت پر مجبور کی جائے گی، کیونکہ ماں اہلیت نہیں رکھتی اوردیگر دوخواتین قابلیت رکھتی ہیں، مگر خالہ جو بعید تر رشتہ دار ہے وہ رضامند نہیں ہے، اس لیے بہن کی تحویل میں زید کو دے دیا جائے، کیونکہ وہ خالہ سے مقدم ہے۔
دفعہ۱۳۔رضاکارانہ پرورش:
- بچہ ماں کے زیرِ حضانت رہے گا، بہ شرط یہ کہ ماں :
الف۔ اہلیتِ حضانت رکھتی ہو۔
ب۔ بغیر اُجرت حضانت پر آمادہ ہو۔
- اگرماں حضانت پر اُجرت طلب کرتی ہو،مگر کوئی اورحضانت کی اہل‘ رضاکارانہ پرورش پر آمادہ ہو ،جب کہ:
الف۔ بچے کا باپ تنگدست ہو، اگرچہ کمانے پر قدرت رکھتا ہو، خواہ بچہ مال دار ہو یا نہ ہو، یا
ب۔ بچے کے پاس مال ہو، خواہ باپ مال دار ہو یا نادار
تو ماں کو بلامعاوضہ پرورش یا بچہ رضاکار عورت کے سپرد کرنے کا اختیار دیا جائے گا، اگر ماں مفت پرورش پر آمادہ نہ ہو تو بچہ رضاکارانہ پرورش کرنے والے کی تحویل میں دیا جائے گا، مگر ماں کو بچہ سے ملنے اور ملاقات کا حق ہوگا۔
ج۔ اگر بچے کے پاس مال نہ ہو مگر باپ خوش حال ہو تو حقِ حضانت ماں کو حاصل ہوگا اوراُجرت باپ کے ذمہ لازم ہوگی۔
- اگر کوئی اہل عورت رضاکارانہ پرورش پر تیار نہ ہو اور:
الف۔ بچے کے پاس مال ہو توحضانت کاحق ماں کو ہوگا اور اُجرت بچے کے مال سے ادا کی جائے گی، خواہ بچے کا باپ مال دار ہو یا مفلس ہو۔
ب۔ اگر بچہ اور باپ دونوں مفلس ہوں تو ماں پرورش پر مجبور کی جائے گی اور اُجرت بچے کے باپ پر دَین ہوگی۔
ج۔ اگر بچے کے پاس مال نہ ہو مگر باپ خوش حال ہو تو اُجرت باپ پر لازم ہوگی۔
4) اگر رضاکار عورت حضانت کی اہلیت ہی نہ رکھتی ہو توحقِ پرورش ماں کو ہوگا، اگرچہ اُجرت بچے کے مال سے لازم آتی ہو۔
5) اگرحقِ حضانت ماں کے علاوہ کسی رشتہ دارکو حاصل ہو اور وہ اُجرت طلب کرے، مثلاً بچے کی خالہ ہو اور اس سے قریب کوئی مستحقِ حضانت نہ ہومگر خالہ اُجرت مانگتی ہو اور پھوپھی مفت حضانت پر آمادہ ہو یا پھوپھی بھی اُجرت کرتی ہو، مگر چچا مفت حضانت پر رضامند ہو تو دفعہ ہذا کے احکام کے مطابق عمل درآمد ہوگا۔
توضیح: اگر ماں کے علاوہ کوئی اہلیتِ حضانت رکھنے والی بھی اُجرت طلب کرتی ہوتو حقِ حضانت ماں کو ہوگا۔
دفعہ۱۴۔ماں کا مفت حضانت سے انکار:
- ماں مفت پرورش پر تیار نہ ہو اور کوئی اہل عورت رضاکارانہ پرورش پر تیار ہو، جب کہ:
الف۔ بچہ کا باپ تنگدست ہو، چاہے بچے کے پاس مال ہو یا نہ ہو
ب۔ بچے کے پاس مال ہو، چاہے باپ خوش حال ہو یا بد حال
تو ماں کو مفت پرورش یا رضاکار عورت کے سپرد بچہ کرنے کا اختیا دیاجائے گا، اگر ماں مفت پرورش پر آمادہ نہ ہو تو اس سے چھین کر رضاکار عورت کے حوالے کر دیا جائے گا، مگر ماں کو بچہ سے ملنے اور ملاقات کا حق ہوگا۔
- اگر بچہ کے پاس مال نہ ہو مگر باپ خوشحال ہو تو ماں کو حقِ حضانت حاصل ہوگا اور اُجرت باپ کے ذمہ لازم ہوگی۔
- اگر رضاکار عورت حضانت کی اہلیت نہ رکھتی ہو تو اُجرت کے ساتھ پرورش کرنے کی مجاز ہوگی، اگر چہ اُجرت بچہ کے مال سے لازم آتی ہو۔
- اگر کوئی عورت رضاکارانہ پرورش پر تیار نہ ہو اور:
الف۔ بچہ کے پاس مال ہو تو اس کے مال سے ماں کو اُجرت ادا کی جائے گی خواہ بچہ کا باپ مال دار ہو یا مفلس ہو۔
ب۔ اگر بچہ اور باپ دونوں مفلس ہوں تو ماں پرورش پر مجبور کی جائے گی اور اُجرت بچہ کے باپ پر دین ہوگی۔
ج۔ اگر بچہ کے پاس مال نہ ہو مگر باپ خوش حال ہو تو اُجرت باپ پر لازم ہوگی۔
دفعہ۱۵۔ اُجرت کا استحقاق:
- پرورش کنندہ ماں کے علاوہ کوئی اورہو یا ماں ہو جب کہ زیرِپرورش بچے کے باپ کی منکوحہ یا معتدہ نہ ہوتواُجرت کی مستحق ہے،اگرچہ پرورش اس پر ازروئے شرع لازم ہو۔
- اگر پرورش کنندہ،خواہ ماں ہو یاکوئی اور کے پاس رہائش نہ ہو تو اسے رہائش کی فراہمی یااجرت کی ادائیگی لازم ہے اور اگر بچہ خادم کا محتاج ہواورباپ مال دار ہو تو اسے خادم مہیا کرنا بھی لازم ہے۔
توضیح:حضانت کی اُجرت، نان ونفقہ اوررضاعت کی اُجرت کے علاوہ ہوگی۔
دفعہ۱۶۔ اُجرتِ حضانت کی ادائیگی:
حضانت کی اُجرت،رضاعت اورنان ونفقہ کے علاوہ ہوگی اوربچے کے مال میں سے واجب الاداء ہوگی بشرطیکہ بچے کے پاس مال ہو، ورنہ بچے کے باپ پر لازم ہوگی، ورنہ جن پر بچے کانفقہ واجب ہو،ان پر لازم ہوگی۔
دفعہ۱۷۔جائے حضانت کی تبدیلی:
- ماں،قیامِ زوجیت کے وقت بدون اجازتِ شوہر اورحالتِ عدت میں مطلقاًبچے کو ہمراہ لے کر سفر کی مجاز نہ ہوگی، جب کہ بعد از انقضائے عدت، زیرِپروش کے ولی کی اجازت کے بغیربھی بچے کوہمراہ لے کرسفر کی مجاز ہے، مگر شرط یہ ہے کہ سفر قریب کا ہو مگر شہرسے گاؤں کا نہ ہو۔ اگر سفر دور کا ہو تو شرط ہے کہ:
الف۔ ماں کاآبائی وطن ہو، اور
ب۔ نکاح بھی وہیں انجام پایا ہو۔
مگردارالحرب کی طرف سفرکے لیے شرط ہے کہ زوجین دونوں حربی ہوں۔
- ماں کے علاوہ کوئی اور عورت خواہ دادی یا نانی ہی کیوں نہ ہو، بچے کے باپ یا اس کے ولی کی اجازت کے بغیر بچے کو لے کر سفرنہیں کرسکتی،خواہ سفر قریب ہی کا کیوں نہ ہو۔
- زیرِ پرورش کا باپ بھی ماں یا دیگر حاضنہ کی مرضی کے خلاف زیرِ پرورش کو سفر پر نہیں لے جا سکتا الا یہ کہ پرورش کنندہ کسی شرعی سبب سے حقِ حضانت گنوا بیٹھی ہو اور بچے کو حقِ پرورش رکھنے والے کے سپرد کرنے کے لیے سفر ناگزیر ہو۔
توضیح: دفعہ ہٰذا میں سفر سے مراد اتنی مسافت ہے کہ بچے کا باپ دن ہی دن میں اسے دیکھ کر واپس گھر نہ پہنچ سکتا ہو۔
دفعہ۱۸۔ حقِ پرورش کااختتام:
لڑکے کی حضانت کی مدت سات سال اور لڑکی کی نو سال ہوگی۔
دفعہ۱۹۔کفالت کا حق:
مدتِ حضانت کے اختتام پر زیرِ پرورش کوباپ یاپھر اس کے وصی، دادا یا پھر اس کے وصی یا پھر قریب ترین مستحقِ عصبہ کے سپرد کردیا جائے گا، بچے کو پرورش کنندہ اور ولی میں سے کسی کے انتخاب کا اور ولی کو انکار کا حق نہ ہوگا، مگر لڑکی غیر محرم عصبہ کے حوالہ نہ کی جائے گی۔
دفعہ۲۰۔بلوغت کے بعد کے احکام:
- لڑکا بلوغت کے بعدبشرطیکہ اس سے فتنہ کا اندیشہ نہ ہو، اور لڑکی جب کہ کنواری اورعمر رسیدہ ہو، یاثیبہ ہومگر اس کے متعلق فتنے کا اندیشہ نہ ہو،رہائش میں خودمختار ہوں گے، چاہیں تو:
الف۔ الگ تھلگ رہیں ب۔ والد کے ساتھ رہیں
ج۔ والدہ کے ساتھ رہیں د۔ کسی اور کے ساتھ رہیں
- لڑکا اگر فاسق ہو اورلڑکی اگر کنواری دوشیزہ ہویا ثیبہ غیر مامونہ ہو تو ولی انہیں اپنے ساتھ رہائش رکھنے پر مجبور کر سکتاہے، مگر لڑکی کی صورت میں شرط یہ ہے کہ ولی، لڑکی کا محرم ہو اور فاسق نہ ہو۔
- اگر لڑکی کا کوئی مستحق عصبہ نہ ہو تو عدالت مجاز ہوگی کہ:
الف۔ اسے الگ رہائش اختیار کرنے کی اجازت دے جب کہ اس پر فتنہ کا اندیشہ نہ ہو، چاہے وہ کنواری ہو یا ثیبہ،یا
ب۔ کسی مسلمان اور قابلِ اعتماد عورت کی تحویل میں دے دے
(جاری ہے)