آزمائشی مدت کی اجرت
سوال :۔
بچےکے لیے ایک ٹیوٹر سے بات کی گئی ،اس نے ہفتہ دوہفتہ ٹرائل کا کہا ، دو ہفتے کے ٹرائل کے بعد ان کا طرزِ تعلیم سمجھ میں نہ آنے کے باعث انہیں منع کر دیا گیا ، اب وہ آدھے ماہ کی تنخواہ مانگ رہے ہیں، جب کہ پڑھایا صرف سات دن ہے، بقیہ عید وغیرہ کی چھٹیاں تھیں۔
جواب :۔
اگر ٹیوٹر سے تنخواہ کی بات طے نہیں ہوئی تھی ، صرف یہ کہا تھا کہ ہم ایک دو ہفتے دیکھیں گے، اگر سمجھ میں آیا تو بہتر، ورنہ منع کردیں گے تو طریقۂ تعلیم سمجھ میں نہ آنے کی صورت میں منع کردینے سے تنخواہ ادا کرنا لازم نہیں ، اور اگر تنخواہ کی بات طے ہوگئی تھی اور یہ بھی طے ہوگیا تھا کہ ٹرائل کی مدت کی بھی تنخواہ دینی ہوگی تو اس صورت میں صرف اتنے دنوں کی تنخواہ دینا لازم ہے جتنے دن پڑھایا ہے، ٹیوٹر کے لیے ایک ہفتہ پڑھا کر آدھے مہینے کی تنخواہ مانگنے کا حق نہیں ہے۔