کسی لائن انویسمنٹ کا حکم
سوال :۔گوگل پر مختلف انویسٹمنٹ ویب سائٹس موجود ہیں لیکن ان کے مالک نا معلوم ہوتے ہیں۔ ہر ویبسائٹ کا اپنا اپنا طریقہ کار ہوتا ہے۔ جیسا کہ میں نے ایک ویب سائٹ کے بارے میں معلومات حاصل کیا ہے کہ اگر میں 10 سے 1000 ڈالرز انوسٹ کرو ں تو وہ مجھے 10 دن میں 15℅ پروفٹ دے گا ۔ اور اگر 1000 سے زیادہ ڈالرز انوسٹ کیا جائے تو پروفٹ(منافع) بھی بتدریج بڑھتا جائے گا۔ اور یہ حال بھی نا معلوم ہو کہ ان ڈالرز سے وہ کونسا کاروبار کرتےہیں۔ تو کیا ایسے ویبسائٹ میں انویسٹمنٹ کرنا جائز ہے یا نہیں۔
جواب :۔کسی کاروبار کے بارے میں اس کا طریقہ کار جانے بغیر اس کے بارے میں کوئی حتمی جواب نہیں دیا جاسکتا۔باقی اصولی جواب یہ ہے کہ اگر کمپنی کا کاروبار معلوم نہ ہو اور یہ بھی معلوم نہ ہو کہ کاروبار ہے بھی یا نہیں تو ایسی مشکوک کمپنیوں میں سرمایہ کاری سے اجتناب کرنا ضروری ہے۔نیز آپ نے جو تفصیل ذکر کی ہے کہ ” اگر میں 10 سے 1000 ڈالرز انوسٹ کرو ں تو وہ مجھے 10 دن میں 15℅ پروفٹ دے گا “۔ انویسمنٹ کا یہ طریقہ جائز نہیں ہے، اس لیے کہ انویسمنٹ میں حقیقی نفع کافیصد طے کرنا ضروری ہے، سرمایہ (کیپٹل) کے تناسب سے نفع طےکرنا جائز نہیں ہے۔