عشاء سے پہلے چاررکعت کا حکم
سوال:۔عشاء سے پہلے چاررکعت کا کیا حکم ہے؟میں نے سنا ہے کہ حدیث میں ہے کہ یہ چاررکعت تہجد کے برابر ہیں؟
جواب:۔حنفی متون میں عشاء سے پہلے چار رکعت کو مستحب شمارگیا ہے۔اس لیے ان کا پڑھنا اچھااورباعث اجر ہے۔جس حدیث کا آپ نے حوالہ دیا ہے اس کے متعلق محدث العصرحضرت مولانا محمد یوسف بنوری رحمہ اللہ معارف السنن میں تحریر فرماتے ہیں کہ : ”کبیری“ نے ”حضرت براء بن عازب رضی اللہ کی تعالیٰ عنہ“ کی حدیث ” سنن سعید بن منصور“ کی طرف نسبت کرکے نقل کی ہے کہ جس نے عشاء سے پہلے چار رکعت پڑھی اس نے گویا اس رات تہجد ادا کی‘‘حضرت بنوری ؒفرماتے ہیں کہ سنن سعید بن منصور کی یہ روایت کئی کتابوں میں نے دیکھی ہے لیکن ان میں سے کسی میں یہ نہیں ہےکہ یہ فضیلت عشاء سے پہلے چارسنتوں کے بارے میں ہے بلکہ ان میں یہ ہے کہ یہ فضیلت ظہر سے پہلے چار رکعتوں کے بارے میں ہے۔(معارف الحديث (4/120) تحقيق اربع قبل العشاء، ط: مجلس الدعوة والتحقيق الاسلامي)