آن لائن چیز خریدکرواپس کرنا
سوال:۔میرا سوال یہ ہے کہ اگر ہم ویب سائٹ پر کوئی چیز خرید تے ہیں مگر وہ چیز اس طرح نہیں جس طرح ہماراآرڈر تھا تو اب ہم کیا کرسکتے ہیں۔اگر ہم چیز رکھ لیتے ہیں اور خریدار سے قیمت کم کرواتے ہیں تو وہ ٹال مٹول سے کام لیتا ہے اوراگر اسی قیمت پر چیز رکھتے ہیں تو وہ ہمارے معیار کے مطابق نہیں ،اس ضمن میں شریعت کیا کہتی ہے۔مارکیٹ کا اصول کیا ہے اور قانون کیا کہتا ہے،یہ دریافت کرنامقصد نہیں ہے،شریعت کیاکہتی ہے؟
جواب:۔ اگر ویب سائٹ پرخریدی گئی چیز ان صفات کی حامل نہ جو صفات اس کی بیان کی گئی ہوں تو خریدار کو خیار رؤیت حاصل ہوگا یعنی وہ چاہے تو سودا منسوخ کرسکتا ہے اوراگرچیز میں کوئی ایسا عیب ہو جس کا خریدار کو علم نہیں تھا تو پھر خریدار کو خیار عیب حاصل ہوگا،جس کامطلب یہ ہے کہ وہ اگر چاہے تو پوری قیمت پر چیز رکھ لے اور اگر چاہے تو سودا منسوخ کردے مگراسے یہ حق حاصل نہیں کہ وہ چیز تو رکھ لے اورعیب کے بقدر قیمت کم کرالے۔