زندگی بھر روزوں کی نذر
سوال: ۔ہندہ نے نذر مانی کہ اگر میرا بھائی پیدا ہوا تو میں ساری عمر روزے رکھوں گی اور پھر اس کا بھائی پیدا ہوگیا تو اب کیا ہندہ ساری عمر روزے رکھے گیاور اپنے ماہواری کے ایام میں کیا کرے گی؟ اور اگر ہندہ روزے رکھنے کی استطاعت نہ رکھے تو کیا کرے، براہ کرم تفصیل سے جواب عنایت فرمائیں۔(شاہنواز ، سوات)
جواب :۔ ہندہ پر ایامِ ماہواری، عید الفطر، عید الاضحیٰ، اور ایام تشریق یعنی ذی الحجہ کی گیارہ، بارہ اور تیرہ تاریخ کے علاوہ باقی پورے سال کے روزے رکھنا لازم ہیں، جس میں سے گیارہ مہینے نذر کے روزوں کے اور ایک مہینہ رمضان کے فرض روزوں کا ہے، نیز ایامِ ماہواری ، عیدین اور ایام تشریق کے روزوں کا فدیہ ادا کرناہوگا۔ ایک روزے کا فدیہ پونے دو کلو گندم یا اس کی قیمت ہے۔اگر ہندہ ضعف،بڑھاپےیا کسی بیماری کی وجہ سے روزے رکھنے پر قادر نہ ہو تو ہر روزے کے بدلے صدقۃ الفطر کی مقدار فدیہ ادا کرتی رہے اور اگر تنگدستی کی وجہ سے فدیہ کی ادائیگی پر بھی قادر نہ ہو تو باری تعالیٰ کے حضور استغفار کے سواکیا کیاجاسکتا ہے۔المحیط البرہانی (2 / 405، الباب السادس عشر فی صدقۃ الفطر، ط؛ دارالکتب العلمیہ۔بدائع الصنائع(3 / 146، کتاب الصوم ، ط؛ دارالکتب العلمیہ)