راستہ کو مسجد میں شامل کرنا
سوال : ہمارے محلہ کی مسجد چھوٹی سی تھی جبکہ برابر میں چوبیس فٹ کا راستہ موجود تھا،ہم نے اس میں سے کچھ حصہ مسجد میں شامل کرلیا ہے جس سے کافی سہولت ہوگئی ہے لیکن بعض لوگ کہتے ہیں یہ شرعی مسجد نہیں اور یہاں نماز پڑھنے سے مسجد کا ثواب نہیں ملے گا۔کیا یہ مسجدشرعی مسجد کہلائے گی یا نہیں ؟کیا ایسا کرنا جائز ہے یا نہیں ؟ نیزاس سے محلہ والوں کو راستہ میں کوئی پریشانی نہیں ہوتی ابھی بھی راستہ کافی کشادہ ہے جو محلہ کی ضرورت کے لئے کافی ہے ۔( عارف ساکرو،کراچی)
جواب:-اگر راستہ کسی کی ذاتی ملکیت نہ ہو بلکہ عام گزرگاہ ہو اور مسجدتنگ ہو تو راستہ کا کچھ حصہ مسجد میں شامل کرسکتے ہیں بشرطیکہ آمدورفت میں تنگی نہ ہو۔ ایسا کرنے سے وہ حصہ شرعی مسجدکے حکم میں ہوگا اور اس جگہ نماز پڑھنے سے مسجد کا ثواب ملے گا کیونکہ عام راستہ ہو یا مسجد ہو دونوں ہی اہل محلہ کی ضروریات کےلیے ہیں ۔( الدر المختار ، کتاب الوقف ، مطلب جعل شیء من الطریق مسجداً 4/377 البحرالرائق ، فصل فی احکام المسجد 5/428۔الفتاویٰ الہندیہ 2/456 ۔ فتاوی ٰ رشیدیہ ،ص: 543)